الواقع برس اخبار محلية وعالمية
📄 هذه الأرض لا تُنسى
✒️ غوى حطيط | موقع الواقع برس الإعلامي
في جنوب لبنان ، قُرى لم يستطع العدو محوها من الذاكرة .
القرى السبع: هونين، إبل القمح، النبي يوشع، قَدَس، المالكية، صلحا وطربيخا… سُلخت عن خريطة لبنان عام 1923، وتغيّرت أسماؤها، لكن أهلها ما نسوها، وبقيت أسماؤها حاضرة في بيوتنا وحكاياتنا.
واليوم، في قرانا الجريحة: عيتا الشعب، ميس الجبل، كفركلا، العديسة، مركبا، حولا، بليدا، عيترون، بنت جبيل، مارون الراس، الخيام، يارون، رامية، الناقورة، الضهيرة، شمع، البياضة، البستان، بيت ليف، يارون، القوزح، المنصوري، كفرتبنيت، النبطية الفوقا، حداثا، بنت جبيل، مارون الراس ، ولائحة تطول من قرانا العاملية .
قرى تهدّمت بيوتها، وتضررت أراضيها، وهُجّر أهلها، وصار كثير من الناس بعيدين عن بيوتهم وأرزاقهم.
والبعد عن القرية مش سهل.
بتشتاق لبيتك، لحارتك، لرائحة الخبز من تنور أمك، لصوت الأذان اللي كنت تسمعه من شباكك، ولشجرة الزيتون اللي زرعها جدك بإيديه.
بتشتاق حتى للتفاصيل الصغيرة اللي كنت تعتبرها عادية، وبتعرف قيمتها لما تبعد عنها.
قد يحتلون تلالاً، وقد يرسمون خطاً أصفراً، وقد يمنعون الناس من العودة إلى بيوتهم…
لكنهم ما بيقدروا يمحوا ذاكرة أهل الأرض.
احتلوا، دمّروا، هجّروا، وأحرقوا.
يمكن كانوا مفكرين إن الركام بينهي الحكاية، وإن البيت إذا تهدّم بينتهي ارتباط أهله فيه.
بس البيت مش بس حجارة.
والأرض مش بس تراب.
كل بيت إلو ناس، وكل شجرة إلها حكاية، وكل طريق إلنا فيه ذكرى.
واللي عاش بالجنوب بيعرف شو يعني تكون قريتك بعيدة عنك، وتضل كل يوم تفكّر فيها.
نحنا ما نسينا.
ولا رح ننسى.
ما مننسى قرية قرية، ولا بيت بيت، ولا شهيد، ولا شجرة زيتون.
من هونين وقلعتها، لميس الجبل وحولا، لعيتا الشعب وكفركلا والعديسة، ولكل قرية وكل شبر من أرض الجنوب.
وسنعود.
مش بس لأننا مشتاقين…
بل لأن لنا في هذه الأرض بيوتاً وأرضاً وذكريات وحقاً.
سنعود لنرمّم ما تهدّم، ونزرع ما احترق، ونفتح أبواب البيوت التي أُغلقت قسراً.
وقد يطول الغياب، لكن ما مننسى طريق الرجعة.
الأرض بتعرف أهلها، وأهلها ما بينسوا أرضهم.
وسنعود… مهما طال الزمن.
