بكلمات مؤثرة الاعلامي علي مرتضى يرثي والدته

1. سامحيني يا امي ..

سامحيني اني نطرتك تفلي تاحكي عنك بالعلن ..

يا امي من لما صار معك عارض الجلطة عام ٢٠٠٥ كنتي نقطة ضعفي ..

كنت حس بالعجز قدام ايدك المشلولة ل ١٣ سنة!!

كنت ابكي ايام لما شوفك ملبكة مش قادرة تفتحي قنينة مي !!

كنت ادايق لما تتلبكي وقت تكوني ما قادرة تلبسي كنزة!!

يا امي من لما صارت معك الجلطة وانا ضعيف ..

ما بحمل تزعلي .. ما بحمل الغلط معك.. وهيدا سر اني بحرق الدنيا كنت اذا حدا زعلّك..

١٣ سنة وانا كل يوم بعد ما تنامي طل عليكي اطمن انك بيناتنا..

كنت خاف!!

خاف فوت عالبيت وما تكوني عم تغنيلي اني جيت..

خاف فوت عالبيت وما تسأليني ” علي .. اكلت عاملتلك اكل فوت صب غذّي حالك” كيف كنتي تعضي عشفافك لما قلك اكلت برّا ..

خاف اخسر عيونك اللي كنت شوف حالي فيهم بطل!! ما حدا بيطلع فيي متلك!! ما حدا بيحسسني بالقوة والثقة بحالي متلك!!

سامحيني يا امي اني كنت قصّر وقت العبطة لان مستعجل ..

سامحيني يا امي اني ما كنت قلك بحبك لان قال كبرت عهالحركات …

سامحيني يا امي لما كنت مثّل اني قوي قدام ضعفك ..

سامحيني يا امي اني ما قضيت عمري تحت اجريكي ..

سامحيني اني كنت سافر عالحرب و اتركك للقلق ..

سامحيني يا امي انو ما كنت اكتب عنك بالعلن !!

سامحيني يا امي اني اجلت زواجي وما فشيتلك خلقك انك تشوفي ولادي !!

انت يا امي بطلة العالم بكل شي !!

بطلة العالم بالحنان .. بطلة العالم بالثقة فيي .. بطلة العالم بالقلق عليي .. بطلة العالم بالجبروت والتحمّل

.. وكمان كنتي بطلة العالم بالموت ..

اسرع حدا بيموت مرق بحياتي ..

اخر كلمة قلتيلي ” قرّب عطيني بوسة” وبعدها بدقائق لاقيتي ربك بين ايديي ..

هيك .. بلمحة .. رحتي واخدتيني معك .. انا بلاكي ميّت ..

مبارح عبطّك وبوستك بايديكي ..واليوم سجيّتك بلحدك بايديي ..

سامحيني يا امي و ترضي عليي ..

وهي قدام الدنيا كلها بقول ..

سامحيني يا امي اني مع كل حبي الك ..

ضليت مقصّر بحقك ..

سامحيني..